ГРК Охрид го претстави новото, осмо засилување за следната сезона. Филип Талески се враќа во Mакедонија во редовите на охридскиот клуб со договор за 2026/2027 со можност тој договор да биде продолжен и за сезоната потоа.
Филип Талески е еден од најпознатите македонски ракометари и за него не е потребно посебно претставување. Минатата сезона ја играше во дресот на Татабања која играше во финалето на ЕХФ Куп токму против ГРК Охрид.
Филип Талески и Охрид беа во преговори и во 2025 година, но тогаш трансферот не се реализираше, а Талески потпиша за Вардар 1961 од каде што по неколку месеци замина во Татабања.
Сега е одново дојдено времето и следната сезона Филип Талески ќе го гледаме во дресот на ГРК Охрид.
"Потписот за ГРК Охрид за мене претставува нов, голем предизвик и исклучително мотивирачки проект. Клубот покажа огромна желба, сериозна визија и амбиција кои целосно се поклопуваат со моите лични и спортски цели. Среќен сум што ќе го носам дресот на Охрид, клуб кој незапирливо расте и има фантастична публика. Охрид заслужува големи ракометни успеси, а јас сум тука да го дадам својот максимум на секој натпревар за да ги оствариме зацртаните цели на клубот како во домашното првенство, така и на меѓународна сцена." - изјави Филип Талески.