Еден од најстарите македонски ракометни клубови, РК Пролет 62 следната сезона нема да биде дел од Суперлигата. Финансиско тешки времиња дојдоа за екипата од населбата Пролет и соочени со неможноста да бидат конкурентни и да го изнесат товарот на својот грб решија да не се пријават за учество во Суперлигата, туку во Првата лига.
Иако одлуката е крајно непопуларна, мораме да додадеме дека е фер и за нивните ракометари и за другите учесници во најсилното натпреварување.
Екипата на РК Струга која има нова управа и беше елиминирана во бараж натпреварот за Суперлига, е најсериозен кандидат да го заземе нивното место.
Пролет со соопштение се одјави од Суперлигата каде што континуирано играше повеќе од 20 години
Почитувани пријатели на ракометот, навивачи, партнери и спортска јавност,
Ракометниот клуб Пролет 62 ја известува јавноста дека, поради завршувањето на договорот со нашиот долгогодишен и ценет генерален спонзор, донесовме тешка, но одговорна одлука да се повлечеме од натпреварувањето во Супер лигата за претстојната сезона.
Оваа одлука не е донесена лесно. Напротив, таа е резултат на внимателна анализа и единствено со цел да се зачува стабилноста и иднината на клубот. Веруваме дека во овој момент најодговорен чекор е да не преземаме финансиски обврски кои не би можеле целосно и навремено да ги исполниме.
РК Пролет 62 останува посветен на својата мисија – развојот на младите ракометари и продолжување на традицијата која клубот ја гради веќе 64 години. Клубот ќе продолжи да се натпреварува во Првата лига, а во наредниот период наш главен приоритет ќе биде пронаоѓање нов генерален спонзор кој ќе овозможи повторно враќање во Супер лигата и продолжување на успесите што заедно ги создававме.
Воедно, упатуваме искрена и огромна благодарност до нашиот досегашен генерален спонзор за долгогодишната доверба, поддршка и несебична посветеност, благодарение на која РК Пролет 62 со години успешно се натпреваруваше и остана дел од највисокото ниво на македонскиот ракомет. Неговиот придонес во одржувањето и развојот на клубот ќе остане трајно запишан во историјата на РК Пролет 62.
Исто така, им благодариме на сите наши навивачи, пријатели, играчи, тренери, родители, соработници и на сите кои во изминатите 64 години беа и остануваат дел од семејството на РК Пролет 62.
Уверени сме дека ова е само еден тежок период кој, со заедничка поддршка и нов партнер, ќе го надминеме и повторно ќе го вратиме Пролет таму каде што припаѓа.
РК Пролет 62