Женската кадетска репрезентација (технички пионерска репрезентација) на Македонија го заврши првиот турнир од регионалната лига У16 со победа над домаќинот Грција од 24-23. Избраничките на Славиша Димитријески во Верија претрпеа пораз од Турција со 26-30, но во вториот натпревар успеаја да се изборат за триумф против грчката селекција.
Турција, која во првото коло ја совлада Грција со 25-24, го заврши турнирот со максимален ефект од двете средби. Македонија има една победа и еден пораз, Грција два порази.
Резултати – Група Д:
Грција – Турција 24-25
Македонија – Турција 26-30
Македонија – Грција 24-23
Регионалната лига У16 е ново натпреварување во кое учествуваат 12 репрезентации, поделени во четири групи. Секоја селекција ќе одигра шест натпревари во групната фаза, низ три турнирски прозорци, а на крајот ќе биде одреден конечниот пласман од првото до 12. место.
Покрај групата Д, во женска конкуренција се натпреваруваат и групите А, Б и В. Во групата А се Словенија, Босна и Херцеговина и Словачка, во групата Б се Хрватска, Црна Гора и Србија, додека групата В ја сочинуваат Косово, Романија и Бугарија.
Вториот турнир за групата Д ќе се игра во Скопје од 11 до 13 декември, кога Македонија повторно ќе се сретне со Турција и Грција.